(1)初步感覺
初初看到S700i外型,的確會覺得好厚好大部,但上手後慢慢會覺得佢厚得有理,而且手感非常好.雖然重量都有137g,但整體上比起z1010及nokia7610好得多!
(2)螢幕
作為首部SE行貨機擁有26萬色螢幕,S700i 的確令人眼前一亮,雖然字體幼細程度不及有CG Silicon的SHARP GX-32,但色彩濃度比起GX-32絕不遜色,在240x320解像度下表現令人極為滿意.加上螢幕極大,如果唔同smartphone相比,S700i有力同GX-32爭靚MON王寶座.
(3)鈴聲
一如以往K700i一樣,直接支援MP3鈴聲及40和弦,MP3鈴聲部份表現甚佳,音質不錯,但最大音量時就未有K700i/p900咁嚇人,不過相比起 Motorola V600,nokia 6230/7610 已屬大聲一族,大家絕對唔駛擔心.
(4)通話音質
本人使用數碼通,接收能力應算本港中上級數,本人曾在銅鑼灣,鑽石山,荃灣,旺角,青衣等多個地方作十分鐘以上通話,表現一貫se機質素,比起我手上另一部最舊版本K700i較好,但我有朋友指仍然未及Z600,如果可以在雜音上作出改良,絕對可以為整體分數加多幾分.
(5)用戶介面
基本上同K700i雷同,但在26萬色之下,圖示實在比以往漂亮得多,反應亦明顯快得多,JAVA速度亦相當唔錯,在檔案管理方面,改用3x3九格形式,一目了然,而檔案名前亦有顯示檔案所在位置(機內記憶/記憶卡),用戶可以隨意COPY或MOVE圖片,音效,影片檔案.雖然記憶卡MS DUO速度都算不俗,但仍建議將常用鈴聲及來電大頭相片抄到機內,並以不同folder分類,減省平時睇Preview thumbnail 時速度.
(6)相機質素
相信最多朋友都會最關心呢一項,作為目前GSM手機最高級數130萬像CCD鏡頭,S700i令我有不少意外驚喜!只要撥開鏡頭側的保護蓋,相機模式便會自動啟動,影相時由於要合上KEYPAD,令到影相時更似手執一部SONY CYBERSHOT P系數碼相機!
相片質素基本上與SHARP GX-32及NEC N830表現差異不大,最大解像度為1280x960,並設有白平衡,補光燈等功能,隨機附上的32MB記憶卡可儲存約140張1280x960相片,一般來說都夠用.而且最特別係返有自動測光功能,初步發現利用呢個功能可以偵察出唔同環境光暗度而自動調教iso值,default係200,大家影完相後抄到電腦便可見到呢個參數.以一部相機手機來計,完全係喜出望外,唯一要挑剔就係欠缺SHARP GX-22同GX-32有的微距模式,否則絕對無械可擊!
另外,在解像度為1280x960作拍攝時,仍然可以用8倍數碼變焦功能,是其他相機手機不能相比的.而在儲存最大解像相片到記憶卡時速度相當快,比起GX-32抄到sd card快上不知多少倍,呢一點SHARP的確有需要在推出下一代機種時以S700i作借鏡.
(7)短片拍攝
短片拍攝一向是目前眾多手機表現較弱的一環,S700i亦不例外.影片最大為176x144 3GPP格式,可支援mpeg-4格式,大家可以用PV author呢類程式自行將AVI/MPEG-1轉換作mpeg-4格式,然後在S700i上收看,表現中規中矩.
(8)電池
S700i沿用Z600同款BST-27電池,3.6V Li-ion 780mAh,雖然不是Polymer電,但電池耐用度竟意外地比起T6x0及K700i更長,相信廠商在省電方面作出不少改進.
(9)價格
如果唔計奸商炒價(我最高見過$6280),以9月24日上市時公價$4980,呢個價錢雖然不菲,但仍屬可接受價位,可能大家會覺得成五千蚊可以分開買DC+mobile,但玩得手電就唔可以咁樣去衡量,而且NOKIA百萬像手機7610推出時要$4380,GX-32亦要$4280,所以我覺得價格上並不算太過份.
當然大家可以等價錢下跌後再入貨,但問題係兩個月內未見有同級機種可以相比,以我所見最大威脅應會係NOKIA 6260,但愛好優質MP3鈴聲及大螢幕者應不會作考慮,而Motorola V3功能上只屬平庸之輩,只靠外型取勝,加上比起S700i貴多一千大元,不足為患,所以價錢上S700i應該會比其他SE機種較硬淨.
總結:
如果你不介意厚厚的機身,S700i絕對係一部相當不錯手機,設計方面頗費心思,尤其係旁邊新增的keylock掣及新設計的十字鍵,令我相當滿意!而且相機方面可見下了功夫,作為SNAP SHOT之用實在不錯,若然遲些貨源充足及價格回復正常,不難成為2004年手機王者!

X